Kur pushteti kthehet në “Çiflig”!
Gazeta
"SOT" 30/05/2010
Politika shqiptare e ka të vështirë të ndahet përfundimisht nga interesat personale, pasi e prej vitesh konsideron politikën si një çiflig të saj. Kur interesat personale përballen me interesat e përgjithshme atëherë, humbet edhe logjika politike. Kjo ndodh kur individët të veshur me kostumin politik veprojnë si të plotfuqishëm në një kohë kur kanë dështuar.
Demokracia shqiptare sot u ka dhënë të drejtën krerëve të pushtetit që, për të na qeverisur, të premtojnë, të gënjejnë e të mashtrojnë sa herë që duan, vetëm e vetëm për të veshur kostumin e pushtetit, së bashku me kravatën politike. U ka dhënë mundësi që, kur marrin në duar frenat e drejtimit të vendit, pa pasur turp e dinjitet të luajnë me fatet e popullit tonë, duke na treguar se pa ta vendi do të shkonte në katastrofë. Abuzimi nën emrin e demokracisë u dha të drejtën atyre që, para popullit të jenë ata, e pastaj populli. Kjo ndodh pasi në praktikë jetën në politikë e shohin si një çiflig.
Flasin dhe premtojnë, pasi e dinë se sa më shumë të premtojnë, aq më shumë do t‘i besojmë... Premtojnë e premtojnë, por kur dështojnë por nuk të thonë as "na falni se bëmë gabim", pasi këto fjalë nuk i njohin më. Në emër të demokracisë abuzohet deri aty, sa vetë tallet dhe luan me ndjenjat e popullit, sikurse ndodhi për vizat, që nuk u liberalizuan.
Meta diktator?...
Uberto Eko ka theksuar, se një diktatori për të qeverisur vendin nuk i duhen tanke, por mbi të gjitha i nevojitet kontrolli i mediave. Me këtë parim mëse dy dekada vepron pjesa më e madhe e politikës shqiptare, duke mos përjashtuar as dhe vetë drejtuesit kryesorë të shtetit, që në emër të demokracisë abuzojnë mbi lirinë e mediave. Bojkotimi i fundit i mediave nga ministri i jashtëm z. Iliri Meta tregon qartë, se vendi ynë tashmë në krahasim me vendet e tjera fqinje ka shumë rrugë për të bërë. Mentaliteti primitiv dhe koncepti i ulët i këtij politikani, që sot mban postin e nënkryeministrit dhe njëkohësisht të kryediplomatit, përbën një rrezik aktual mbi lirinë e mediave.
Ky fenomen “cinik” nuk përbën rastin e parë as edhe të fundin, pasi sistemi i sotëm politik në vendin tonë fatkeqësisht është ngritur mbi themelet e interesave dhe të dëshirave të politikanëve. Kryediplomati Meta përballë mediave po jep shembullin më të keq jo vetëm për politikën dhe shoqërinë shqiptare, por mbi të gjitha po jep shembull edhe përball vendeve e tjera të rajonit. Liria e fjalës së lirë në demokraci nuk është dhuratë e politikës së qeverisë aktuale, po është detyra e kësaj që të respektojë të drejtat themelore.
Gjithnjë e patundur
Gazeta “SOT” gjithnjë ka mbajtur një qëndrim të patundur dhe të asnjanshëm përballë interesave kombëtare. Si një “rebele” përball qeverisë, vite më parë gjobitej nga ish kryeministri Nano, ndërsa sot i mbyllet dera dhe i shkëputen kontaktet e informacionit nga dora e kryediplomatit. Dhe kjo ndodh sot në vitin 2010. Padrejtësitë sapo kanë filluar, ku seleksionimet në dhënien e informacionit në media mbajnë vulën e shtetit...Meta si nënkryetar i qeverisë, apo kryetar i LSI dhe njëkohësisht kryediplomat ka zgjedhur rrugën më të lehtë dhe më të gabuarën, duke dhënë një imazh të keq përballë ndërkombëtarëve, në një kohë kur nuk duhej bërë. Indiferentizmi i presidentit Bamir Topi është i papajtueshëm aq sa edhe për kryeministrin Sali Berisha.
Inatet personale kundra mediave janë të tepërta
Inatet personale në politikë kundra mediave të pavarura janë të tepërta, për një vend që sot më shumë se kurrë pretendon të bashkohet në familjen europiane. Rasti unik përbën një rrezik për lirinë e mediave, në përgjithësi. Në mars të viti 2008 me porosi të kryeministrit Sali Berisha gjobitet me 20 milionë lekë gazeta “Sot”. Po kjo gazetë ka qenë viktimë edhe e ish kryeministrit Fatos Nano. Viktimat në shtypin e shkruar pasojnë njëra tjetrën. Pushteti aktual me kryeministrin Berisha nuk e ka dashur asnjëherë shtypin e lirë.
Sot është viktimë gazeta “SOT”, ndërsa nesër do të jetë një tjetër. Dështimi në politikë e kudo gjithnjë është në mikroskopin e mediave pasi kjo është edhe detyra kryesore. Kjo gjë duhet të kuptohet drejt edhe nga kryediplomati edhe nga kushdo njeri tjetër i veshur me pushtet, që gjëra të tilla të mos përsëriten më. Dihet që demokracia nuk mund të qëndrojë në këmbë e të ecë përpara pa lirinë e mediave. Është populli që me votën u dha besimin për të qenë në krye, për të qeverisur vendin me përgjegjësi të plotë.
Në themelet e demokracisë së brishtë shqiptare të sapondërtuar, z. Meta po jep shembullin më të keq përballë elektoratit të tij, duke mos u shkëputur një herë e përgjithmonë nga nostalgjia e të kaluarës. Njëkohësisht, Meta futet në rangun e gjeneralëve, që kur fitojnë betejën në luftë, zor se mund të bëjnë paqe. Vendi ynë po përballet sot me një politikë të ndershme dhe të pandershme, po përballet me realitetin e politikës shqiptare, po përballet me nderin dhe dinjitetin. Po qeveriset nga një n/kryeministër jo transparent, po udhëhiqet nga një politikan i vjetër që di të menaxhojë më mirë se kushdo tjetër votat e vjedhura.
Në qeverinë Berisha, egoizmi e ka ndryshuar atë plotësisht, duke treguar në veçanti edhe karakterin e tij politik, ku fati i qeverisë aktuale varet plotësisht në duart dhe mendjen e tij cinike, duke treguar këtë njeri me dy fytyra, duke treguar se sa i mbyllur është me dinjitetin e një n/kryeministri historik në raport me ish-paraardhësit e tij. Meta i djeshëm nuk ka asgjë të përbashkët me Metën e sotëm. Me çdo lloj mënyrë mundohet të mbajë karrigen e n/kryetarit të qeverisë dhe të kryediplomatit në kundërshtim me besimin votues.
Dështim politik?...
Pa respektim, nuk mund të ketë integrim. Diplomacia e jashtme mban përgjegjësi morale, ku, edhe pse nuk përmbushte kushtet për liberalizmin e vizave, premtonte dhe mashtronte popullin shqiptar. Liberalizimi i vizave ka kushte dhe detyrime dhe më pas të drejta për ta kërkuar atë. Mekanizmat e pushtetit, diplomacia e jashtme dhe ajo e brendshme nuk punuan sa duhej në këtë drejtim...
Politika shqiptare në pretendimin e saj për liberalizimin e vizave duhet të ketë kujdes në emigracionin ilegal. Vitin e fundit në kufirin grek janë kapur 50.000 emigrantë shqiptarë ilegalë, kjo ka bërë që ky vend të kthejë për në vendin e tyre çdo ditë tre-katër autobusë me emigrantë klandestinë. Kjo gjë doli edhe në raportin e Komisionit Evropian pak ditë më parë, ku i kushtohej vëmendje emigracionit ilegal, me pretendimin se: “nevojitet akoma një menaxhim i integruar i kufijve në bashkëpunim me një plan konkret së bashku me policinë e kufirit dhe rritjes së kapacitetit dhe investimeve të infrastrukturës”.
Shumë shqiptarë nga premtimet e bëra para kohe u zhgënjyen, por kjo jo për faj të të tjerëve. Detyrimet për plotësimin e kushteve të vendosura nga BE ishin njëlloj për të gjitha vendet e Ballkanit Perëndimor që kishin dëshirë për liberalizimin e vizave, por politika shqiptare me kohë as që ua vuri veshin fare. Për këtë dështim politik, moralisht para popullit ka përgjegjësi, jo vetëm mazhoranca, por edhe të gjitha partitë opozitare që në njëfarë mënyre zhgënjyen mbarë popullin shqiptar.
Greqia, dekret për vrasjen e mushkave që vijnë ilegalisht nga Shqipëria
Gazeta "SOT" 26/05/2010
Gjatë 20 viteve të fundit, me dhjetëra kuaj dhe mushka me “pasaportë” shqiptare janë masakruar dhe groposur në Greqi
Ndoshta e pabesueshme, po një realitet. Një veprim i tejnxituar në dëm të një vendi tjetër fqinj për vrasjen e kafshëve. Përse?... Një dekret i presidentit vendas i vitit 1991, u jep të drejtë autoriteteve vendore që të masakrojnë barbarisht deri në vrasje kuajt dhe
mushkat me “pasaportë” shqiptare, që janë futur ilegalisht në këtë vend të BE. Gjatë 20 viteve të fundit, me dhjetëra kafshë të tilla janë masakruar me metoda të ndryshme dhe janë groposur nga autoritetet në përputhje të zbatimit të dekretit presidencial, me justifikimin se vijnë nga vende jo anëtare të BE, përballë indiferentizmit të politikës shqiptare. Në emër të ruajtjes së shëndetit të popullit grek, kafshët shqiptare përfundojnë në gropa masive…
Melodia e skandaleve helene nga dita në ditë vazhdojnë të dalin në sipërfaqe, duke kaluar çdo lloj fantazie, me protagonistë vetë politikën vendase, që në mënyrë kasaphane vrasin kuajt dhe mushkat e ardhur nga Shqipëria. Qytetet Kosturi, Kastoria, Follorina dhe Prespa, janë epiqendra ku këto kafshë ekzekutohen dhe groposen ende pa u dalë mire shpirti me vulën e kreut të shtetit të Presidentit. Edhe pse këto kafshë nuk e kanë ballë apo në patkua të shkruar kombësinë dhe ende pa asnjë prove se nga kanë ardhur, ekzekutohen dhe groposen me fadroma dhe ekskavatorë, pasi mendohet se vijnë nga Shqipëria. Në të gjitha rastet kuajt dhe mushkat ndalohen nga rojet kufitare u dorëzohen organeve përkatëse vendore, që i ekzekutojnë pa asnjë ngurrim në mënyrat nga më barbare në zbatim te dekretit të presidentit, duke mos zbatuar anën tjetër të dekretit që bën fjalë për vrasjen e tyre me injeksion.
Barbarizëm me vulën e shtetit
Pak kohë më parë, 5 mushka u vranë në mënyrë barbare nga autoritetet e Prespës, në një kohë kur duhej të trajtoheshin me ushqim nga policia dhe t’u ishin dorëzuar autoriteteve shqiptare. Mushkat e ndaluara nga policia sipas ligjit janë përvetësuar dhe janë bërë mall i shtetit grek pa venë në dijeni autoritetet shqiptare, në një kohë kur dihej që ato do të vriteshin në mënyrë barbare. Por edhe kur këto vrasje janë publikuar nga media greke, ato ende vazhdojnë, me të njëjtën mizori përballë indiferentizmit të shtetit shqiptar që akoma nuk ka gjetur kohë për të hetuar vrasjet e kuajve, që sit ë tillë gabimisht kanë kaluar kufirin shqiptar e më pas atë grek. Edhe pse jetojmë në shekullin e 21 mizoritë e fqinjit Helen përball kafshëve të një vendi tjetër fqinj vazhdojnë.
Ministria e Bujqësisë dhe Zhvillimit, protagonistja e vrasjeve
Është kjo ministri që ka marrë përsipër ekzekutimin e kafshëve që vijnë nga Shqipëria, bazuar sipas dekretit të Presidentit grek të 1991. Vrasja e kafshëve që vijnë nga Shqipëria kryhet nga ky dikaster sipas dekretit presidencial me pretekstin pasi vijnë nga një vend jo i Bashkimit Europian… Por me gjithë reagimet e kësaj shoqate vrasjet e kafshëve ende vazhdojnë. Askush me gojën plot nuk mund të thotë përse ndodh kjo armiqësi dhe egërsirë e vendit fqinj, firmosur dhe vulosur nga vetë kreu i shtetit Helen. Por një pyetje mbetet: Përse duhet të ekzekutohen në emër të “ruajtjes së shëndetit” kuajt dhe mushkat, ndërsa kafshët e tjera si qingjat dhe kecat jo?
Reagimi i avokatit grek
Skandali i 20 vjetëve të fundit ka dalë në dritë në prag të festës të Krishtlindjes të 2006 ku avokati grek Angjelos Angjeletos, i njohur si kryetar i Shoqatës së Përkujdesjes për Jetën e Kafshëve, pat reaguar ashpër, për vrasjet në mënyrë makabre të kafshëve (mushkave dhe kuajve) të ardhura nga vendi ynë në mënyrë “klandestine”. Reagimi i avokatit bëri që këto masakra të kryera nga dora e shtetit grek të marrë përmasa në shkallë vendi, duke kërkuar dhe ndërhyrjen e vetë prokurorit të qytetit Kastoria, vendi i ekzekutimit të kafshëve. Ishte një veprim i nxituar ku dhe pretendojnë se e kanë bërë për arsye shëndetësore, por unë nuk shoh të vërtetë këtë, thotë avokati Angjeleto. Më pas ai i ka kërkuar përgjigje ish ministrit të Bujqësisë dhe Zhvillim z. Bosiako për të mos mbuluar këto masakra.
Cila është përgjigja e shtetit shqiptar?
Një përgjigje prej vitesh pritet nga shteti shqiptar që gjithmonë përballë padrejtësive të kryera nga grekët ka mbajtur një qëndrim pasiv. Po me të drejtë një pyetje bëhet; se cili do të jetë qëndrimi i autoriteteve përkatëse shqiptare, kur në vendin fqinjë reagojnë vetë grekët përse vriten barbarisht kafshët shqiptare? Besoj se fotot e publikuara do të sensibilizojnë sado pak politikën shqiptare që më së fundi do të bëjë atë që duhej të kishte bërë këtu e 20 vite më parë. Hetimet në Greqi kanë filluar me mendimin se këto masakra nuk do të kalojnë lehtë, po nga përfaqësia shqiptare nuk është bërë asnjë përpjekje për ndjekjen e problemit. Asnjë vend nuk ka të drejtë të zhdukë e të shkatërrojë nga faqja e dheut atë që nuk ka prodhuar vetë. Asnjëherë nuk është vonë kur flitet për padrejtësi në dëm të një tjetri. Të paktën të veshin njëherë pantallonat e burrërisë politikanët shqiptarë e të kërkojnë arsyen e vrasjeve makabre dhe të ngrenë imazhin e vendit të tyre atje ku i takon... Të shpresojmë …
Dështimi i një ambasadori
Ambasadori shqiptar z. Vili Minarolli
Gazeta "SOT" 21 /05/2010
(Shqipëria, vendi ku të paaftët bëjnë karrierë)
Minarolli, në katër vite si ambasador në Greqi, nuk ka bërë asnjë marrëveshje shtetërore, ndërsa të ardhurat në ambasadë ranë 10 herë më pak. Për këto dështime qeveria duhet të jetë më ambicioze në diplomacinë e jashtme, aq më shumë kur emërimet bëhen në vende të Bashkimit Europian.
Ky është fakt. Vendi ynë në këto katër vitet e fundit ka humbur në arenën ndërkombëtare duke mos realizuar asnjë nga objektivat me vendin fqinj. Dhe kjo ka ardhur si rezultat i emërimeve të ambasadorëve tanë të paaftë të ardhur nga radhët e militantëve partiak, që në praktikë treguan se kështu nuk mund të vazhdohet më tej. Minarolli largohet për t’u riemëruar përsëri në një nga vendet e tjera të BE. Edhe pse ka dështuar në Greqi, kryeministri Berisha e ka besuar përsëri si ambasador në Austri, duke e zëvendësuar me z. Dervishi, diplomat karriere...
Një institucion shtetëror që nuk ka vend për njerëz të aftë, që kanë mbaruar studimet përkatëse, për njerëz të aftë e mëndje të freskët, padyshim është i një energjie që nuk i përgjigjet situatës në një kohë kur Shqipëria po bëhet gati të trokasë në portën e BE, vazhdon ende të punojë me mentalitetin ballkanik.
Vihet re se, kur një ambasador i ardhur në Greqi nga SHBA, si dhe kur largohet për në vendin e tij vendoset në detyrat më të larta. Po me të njëjtën logjikë vepron edhe Greqia. Nga politika shqiptare dihet shumë mirë që në disa shtete të BE, nuk pranojnë ambasadorë të kriterit politik, por pranohen diplomatë karriere. Fatkeqësisht të kundërtën ndodh me shtetin tonë, ku në vendet e BE-së, vendosen ambasadorë dhe diplomatë të karakterit politik, militantë partie, që në shumë raste kanë treguar se janë thjesht zbatues, ose përcjellës megafonë të politikës së qeverisë. Ky fenomen që u duk pas viteve ‘90-të, e që vazhdon akoma deri më sot.
Gjatë qeverisjes së parë z. Berisha, shumë diplomatë e deri në nivel ambasadorësh, janë shpallur me etiketën e njohur “No Grata”, për përfshirje në trafiqe të paligjshme nga vendet që aktualisht janë anëtare të BE-së. Kjo ka sjellë që sot sistemi i karrierës i diplomatit të jetë dëmtuar rëndë në sistemin e shërbimit me jashtë, duke shkelur hapur ligjin, ku përgjegjës për krijimin e gjendjes së sotme janë marrëdhëniet midis kryeministrit dhe presidentit, në mungesë të një dialogu të përbashkët për interesa të Kombit Shqiptar.
Padyshim emërimi i Minarollit nga vetë kryeministri Berisha si ambasador në Greqi ishte një zhgënjim dhe një pendim i tij. Largimi i ish ministrit të Jashtëm z. Mustafaraj tregoi se ishte vetëm fillimi i së keqes. Por mbi të gjitha drejtimi i ambasadës nga gruaja e Minarollit uli së tepërmi imazhin e tij si ambasador i plotfuqishëm përballë emigrantëve…
Ambasada një javë pa drejtues
Ndoshta e pa besueshme po një realitet që sundon në mentalitet. Ambasada shqiptare në Athinë ka qëndruar një jave pa ambasadë pasi Minarolli nuk dëshironte që dorëzimi i dokumentacionit të bëhej sipas rregullave në fuqi, e që nuk dëshironte që në prani të ishte edhe ish ambasadori Bashkim Zeneli me pretekstin se ishte i partisë së majtë. Kjo ndikoi që ambasada të mos merrej në dorëzim ne prezencë të dy ambasadorëve, ku edhe kështu ndodhi. Lind pyetja, përse gjithë kjo armiqësi?
Nuk ndau pushtetin nga shteti
Faktikisht tek ambasador Minarolli në katër vjet, emigrantët panë se ai i kishte mëshuar më shumë qëllimit të tij politik partiak se sa detyrave të ngarkuar nga shteti shqiptar. Më shumë Minarolli ishte i interesuar drejt vijës politike partiake, duke i dhënë shumë qartë imazhin para emigracionit shqiptar në Greqi se sa partiak ishte. Ai kur nuk ndau pushtetin nga shteti duke “harruar” se ishte ambasador i gjithë shqiptarëve.
Për korrupsion largohen 9 diplomatë
Minarolli, ndryshe nga ambasadorët e mëparshëm nën petkun e luftës kundër korrupsionit e ktheu Ambasadën Shqiptare në një “Gestapo”, duke vendosur në zyrat e diplomatëve tanë kamera vëzhguese, si edhe u mbylli portën emigrantëve që nuk kishin të njëjtë vijë politike me të. Gjatë karrierës së tij si ambasador, nga paaftësia e tij u larguan 9 diplomatë për përvetësim dhe shpërdorim detyre, ndërsa një pjesë tjetër u larguan me dëshirë, ashtu siç ishte rasti i sekretares së tij. Po këtë rrugë duhej të kishte ndjekur dhe ai. Është e para here në historinë e diplomacisë shqiptare, që një ambasador pa mbaruar mirë mandatin e tij, të jenë larguar komplet stafi i tij, përfshi këtu edhe shoferin dhe rojën që hap e mbyll derën, për ryshfete dhe korrupsion...
Duhej të ishte larguar me kohë
Me kohë duhej të kishte bërë gati valixhet për të ikur nga ambasada, pasi në këto katër vite të fundit vetëm shqetësime i ka sjellë vendit tonë dhe vendit fqinj. Largimi i tij në kohën e duhur do të ndikonte në përmirësimin e imazhit të Shqipërisë, jo vetëm për Greqinë, por edhe për komunitetin e BE-së. Po kjo nuk ndodhi asnjëherë edhe pse njihej si një politikan i dështuar i qeverisë Berisha. Rrahja me ish konsullin, futja e policisë greke brenda në zyrat konsullore, dalja e certifikatave false dhe trajtimi në median greke, si dhe probleme të tjera, duhej që ky ambasador të kishte kërkuar vetë largimin e tij.
Ambasadori shqiptar duhet ta ketë të qartë, se vendi i punës nuk është çiflig i një partie, as edhe e një pushteti, por do të ishte mirë që të ishte i gjithë përfaqësues i gjithë shtetit në vendin ku është atashuar. Të interesohet për emigrantët shqiptarë, problemet e tyre, si eurot që paguajnë për shërbimet konsullore që të shkojnë në arkën e shtetit dhe jo në xhepat e tjetërkujt. Një fakt konkret është se, më 13 nëntor të 2007, ambasadori ynë Dr. Minarolli ka marrë nga autoritetet greke një shkresë që bën fjalë për gjashtë dokumente të dyshimta (falsifikuara). Po më 22 nëntor të 2007, ambasadori ynë i ka kthyer përgjigje zv. ministrit të Jashtëm grek z. Valinakis, duke pranuar se gjashtë dokumente ishin jo origjinale.
Të ardhurat në ambasadë, 10 herë më pak
Përveç dështimit në fushën politike, një dëm të madh i ka sjellë edhe në fushën ekonomike. Të ardhurat në këtë institucion shtetëror ranë në 10 herë më pak. Konkretisht nga 5 milionë euro që mblidheshin në arkën e shtetit në vitin 2006, sot kanë rënë në 500 mijë euro, me justifikimin se ato tashmë kanë kaluar në ambasadën greke në Tiranë. Si drejtues i stafit të këtij institucioni shtetëror ai mban përgjegjësi të plotë për humbjet ekonomike në arkat e shtetit, nga përvetësimet e parave të individëve nëpërmjet ryshfetit.
Minarolli nuk mund të mohojë se nuk i njihte sekserët jashtë godinës konsullore, pasi kamerat e vendosura jashtë ambasadës, ndiqeshin nga një ekran i madh televizioni po nëpërmjet tij. Veprime këto të njohura dhe të stërnjohura nga shteti shqiptar. Para të shumta që kaluan për vite të tëra nga njëra dorë në tjetrën, po në dëm të vetë shtetit.
Në katër vjet, asnjë marrëveshje
E pabesueshme po një realitet. Asnjë marrëveshje ndërmjet dy vendeve nuk ka bërë të mundur që të realizonte me këtë vend të BE ambasadori ynë z. Vili Minarolli. Edhe pse ka dështuar plotësisht në vendin më të afërt fqinj, ai tashmë me mënyrat nga më të ndryshme paraqitet si një fitimtar dhe jo humbës. Pushteti dhe roli i gruas së tij në drejtimin e ambasadës gjatë kësaj periudhe bëri të mundur spostimin indirekt të tij në fushën diplomatike. Po të kthehemi në vitet 2002-2004 te ish kolegu i tij Bashkim Zeneli, do të shohim se çdo vit ishin bërë 7-8 marrëveshje në vit, ndërsa sot shohim se për periudhën 2006-2010 Vili Minarolli nuk ka bërë të mundur të lidhë asnjë marrëveshje të vetme.
Emigrantët duam që ambasada të jetë e jona
Këto kërkesa kanë dalë nga protestat e tyre që janë bërë përball derës së ambasadës, që me të vërtetë është kthyer në një degë partiake. Edhe pse porta e saj duhet të qëndrojë e hapur për çdo shqiptar, kjo i përket të kaluarës, pasi e sotmja flet krejt ndryshe. Minarolli dha shembullin më të keq si ambasador, duke i ndarë emigrantët në të “majtë” e të “djathtë”. Emigrantë me bindje të ndryshme politike, por që nuk ishin të djathtë për të ishin pijanecë dhe armiq dhe u mbyllej dera.
Si militant partie ai theu pllakën përkujtimore prej mermeri në hyrje të ambasadës, ku bënte fjalë blerjen e ambasadës me kontributin e emigrantëve në kohën e ish ambasadorit Bashkim Zenelit. Sot emigrantët kërkojnë që ajo pllakë të vendoset përsëri në vendin e mëparshëm. Largimi i tij nga Greqia edhe pse i tej vonuar përbën një fitore për emigracionin shqiptar me shpresën se, ardhja e “ambasadorit të ri” z. Dervishi do bëjë që Shqipëria të ketë ambiciet e saja për rritjen e mëtejshme të imazhit të Shqipërisë përball Greqisë…
Gazeta "SOT" 30/05/2010
