Shqipëria në duart e kujt!?
Gazeta “SOT” 1 Tetor 2011
Nuk ka asnjë dyshim që Shqipëria e sotme ka rënë në duart e një grupi njerëzish që për nga mënyra sesi po e drejtojnë këtë vend të brishtë në mes të Evropës, do ta kishin zili edhe vendet më diktatoriale të Lindjes së Mesme. Por ja që fati na solli që vendi ynë të bjerë përsëri në duart e këtyre njerëzve, të cilët nuk kanë asgjë të përbashkët me drejtuesit e vendeve demokratike. Me një president “kukull” që në mënyrë publike e shohim vetëm në shkallet e stadiumeve duke ndjekur ndeshjet e futbollit, apo në ndonjë intervistë që thuajse kjo është detyra e tij, duke mos u prononcuar për atë çka po ndodh me vendin. Dihen kompetencat e tij, po kjo në asnjë mënyrë nuk mund të shfajësojë rolin dhe pozicionin e tij indiferent, në një kohë që vendi ndodhet në një situatë të vështirë politike. Pushteti i sotëm që ka uzurpuar gjithë shtetin, po e udhëheq vendin më keq se asnjëherë tjetër, duke shkelur në të gjitha drejtimet parimet demokratike, duke e ndarë shoqërinë Ne në pushtet dhe Ju në opozitë, duke e shpërbërë shoqërinë shqiptare në shumë shoqëri.
Shqipëria gjithashtu ndodhet edhe në duart e një opozite, që tjetër premton dhe tjetër vepron, të një opozite që njeh vetëm humbje, që nuk është në gjendje të mbrojë votën e saj. Është kjo opozitë si forca më e madhe e vendit që nuk di të luajë rolin e saj të vërtetë në momentin dhe kohën e duhur, duke i dhënë gjithnjë e më shumë terren qeverisë në shkatërrimin plotësisht të vendit. Vendi ndodhet në duart e qeverisë dhe opozitës, më konkretisht: të hajdutit dhe të viktimës, dy protagonistëve kryesorë që janë përgjegjës të dështimit në rrugën e integrimit të vendit. Bojkoti është arma e fundit e opozitës, që përbën krim kur ka të bëjë me integrimin e vendit, por që gabimisht opozita këtë rrugë zgjodhi.
Në emër të demokracisë, Shqipëria ndodhet në duart edhe të një sistemi politik të rënduar dhe tej të korruptuar, me një parlament të copëtuar dhe të diktuar nga qeveria, me një parlament konfrontimi në mungesë të një kulture politike dhe tolerance. Me një parlament që nga ethet partiake po shkel gjithnjë e më shumë parimet demokratike, duke vendosur përfundimisht diktatin qeveritar. Një parlament i neveritur që nuk ka asgjë të përbashkët me parimet demokratike të vendeve të tjera të Europës. Me një gjyqësor të kompromentuar në mungesë të një shteti ligjor, ku drejtësia ka vdekur një herë e përgjithmonë. Të një drejtësie që u ka zgjidhur duart një pjesë të politikanëve tanë që të vjedhin pasuritë e popullit, të shesin edhe sovranitetin, nderin dhe dinjitetin e kombit shqiptar.
Është kjo Shqipëri që ka rënë në duart e një qeverie që akuzohet për vjedhje, vrasje dhe për kusari, por që më pas mundohet që të ndërrojë lëkurën e saj të ndotur, përballë popullit të varfër. Këtij populli që nuk meriton të trajtohet dhe njëkohësisht të dënohet moralisht dhe “penalisht” nga ndërkombëtarët si një komb i fundit i Ballkanit, për paaftësitë politike të pushtetit të sotëm.Fatkeqësisht ndodhet në duart e një pushteti që vjedhësit, të korruptuarit dhe vrasësit jo vetëm që nuk dënohen penalisht, por përkundrazi bëjnë pjesë akoma në kabinetin e qeverisë, por dhe ndonjë tjetër në krye të Bashkisë së Tiranës.
Korrupsioni si dhe vrasjet janë bashkëudhëtare të përhershme të sistemit të sotëm politik në Shqipëri, në mungesë edhe të një shteti të ashtuquajtur Ligjor.Shqipëria ndodhet në duart e një pushteti që kërkon të udhëheqë me metoda të tipit diktatorial, duke shkatërruar sindikatat, forumet e rinise dhe atë të gruas, të udhëheqë drejt një rruge me demokraci të tipit Berishian. Të udhëheqë me çdo mënyrë edhe pa opozitën. Populli shqiptar gjatë 20 vjetëve të pluralizmit pati në dorë për të ndryshuar të ardhmen e vendit, gjë që nuk e bëri. Sot paguan gjynahet e këtyre 20 vjetëve të humbura, për këtë fakt nuk na e ka fajin të tjerët. Shqipëria ndodhet në duart e “horrave dhe lavireve të bulevardit” (kjo sipas kreut të qeverisë), ndodhet në duart e atyre njerëzve që për ironi kanë krijuar një atmosferë që të mbush me trishtim, që po na shfaqin përditë dhe publikisht një luftë egoje të pandershme politike. Ndodhet në duart e atyre njerëzve që për interesa personale penguan edhe njëherë rrugën e integrimit të vendit. A e meritonte populli shqiptar që gjatë 20 vjetësh, të kishte këtë mënyrë qeverisje si kjo e sotmja? A do ta dëshironte ndonjë vend që të kishte këtë lloj qeverisje “Made in Albania”?
Koha, si barometri më i saktë ka treguar që askush nuk ka qenë i përjetshëm në qeverisjen e një vendi, sado i fortë që mund të ketë qenë, duke na kujtuar edhe njëherë se çdo lloj qeverisje është kalimtare. Asgjë nuk mbetet përjetë, ashtu siç është. Në botë, asnjë udhëheqës që ka shkelur parimet demokratike, nuk i ka shpëtuar dot drejtësisë së vendit të tij. Shqipëria, fatkeqësisht ka rënë në duart e një pushteti që për të mbajtur atë të përjetshëm, po shkel çdo ditë parimet më elementare të demokracisë, duke e çuar vendin atje ku nuk e meriton...
Trojka fundos Greqinë
Gazeta “SOT” 20 shtator 2011
Paraja e botës të lë në mes të rrugës. Greqia ndodhet përballë një atmosferë të tej rënduar, pasi ka humbur besimin tek partnerët e saj, të cilët shikojnë me dyshim reformat antikrizë të marra nga qeveria Papandreu. Askush nuk do të kishte dëshirë të ndodhej në vend të saj. Po pësimi duhet marrë si mësim.
Greqia, si një nga vendet më të bekuara të rruzullit tokësor ka mbetur në mes të rrugës, që përbën sot viktimën e parë në komunitetin e BE, si një vend eksperimental për vendet e tjera, duke u fundosur përfundimisht për të mos u ngritur më kurrë në këmbë. Greqinë mund ta shpëtojë vetëm Zoti, në qoftë se ai ulet në tokë, pasi gjendja e saj aktuale tregon se ky vend do t’i nënshtrohet një varfërie të tmerrshme e të paparë ndonjëherë. Askush nuk e mendonte që një ditë, nderi dhe krenaria e helenëve që dikur i dhanë botës dritë, sot do të nëpërkëmbëshin për dhjetra miliardë euro. Por ja që ndodh. Është politika ajo që ngre apo fundos vendin, ul nderin dhe dinjitetin përballë të huajve. Janë vetë grekët dhe askush tjetër që fundosin vendin e tyre, të bekuar nga dora e Zotit. Asnjë vend sado i zhvilluar të jetë nuk mund të përballojë dot të paguajë 87 taksa brenda një periudhe dy vjeçare, e jo më Greqia. Janë këta që na japin mësim se asnjëherë nuk i duhet besuar plotësisht politikës, pasi këta janë kalimtarë dhe më pas hallet ja faturojnë popullit.
Papandreu gjunjëzon popullin, vendos 87 taksa
Qeveria e Papandreut, nën presionin e Trojkës me masat antikrizë ka gjunjëzuar përfundimisht popullin helen. Gjatë dy viteve të qeverisjes së vendit nga kryeministri Jorgo Papandreu, populli i tij është përballur deri më sot me 72 taksa, në një kohë që qeveria ka deklaruar edhe vendosjen e 15 taksave të tjera deri në fund të 2011. As gjendja e mjeruar ekonomike nuk mund të ndalë dot Trojkën që në çdo dy muaj i kërkon Greqisë të bëjë kurban popullin e gjunjëzuar, me vendosje taksash të reja, me qëllim për të siguruar kreditë e dhëna. Me gjithë masat antikrizë të marra nga qeveria Papandreu, kjo e fundit është në pritje për të marrë kredinë e 6 –të dhe për këtë duhet të realizojë premtimet e bëra Trojkës më 21 korrik të 2011. Po me gjithë këtë gjendje të rëndë ekonomike, ky vend po i tregon Trojkës dhe BE se ende nuk ka realizuar asnjë nga premtimet e bëra, por vetëm din të kërkojë kredi të reja. Greqia rrezikon sërish të mos ketë para për të shlyer detyrimet e saj. Ajo priste që këtë muaj të merrte rreth 8 miliard euro, por liderët e eurozonës e shtynë vendimin deri në tetor –nëntor pasi Greqia nuk po bën aq sa duhet për të reduktuar shpenzimet.
Greqia harxhon më shumë se sa prodhon
Analistët vendas dhe ata të huaj theksojnë se ky vend përbën një rast të veçantë për BE, edhe sikur t’i falen borxhet Greqisë, ajo prapë se prapë do të ketë nevojë për kredi të reja bankare, pasi prodhimi i përgjithshëm i vendit nuk mbulon dot shpenzimet e shtetit. Këtë e deklaroi edhe dy ditë më parë në një intervistë për mediat ish ministria e Jashtme e Greqisë zj. Dora Bakojanis. Greqia ndodhet përpara një plagë të madhe, hapur gjatë 30 viteve të fundit nga politika e vendit. Numri i madh i punonjësve administrativë përbën një gangrenë për ekonominë e vendit. Në këtë vend një në dhjetë grekë është punonjës në administratë shtetërore, pra jo prodhuese. Llogaritet se numri i tyre shkon në 1 milionë, krahasuar 5 herë më shumë se në Hollandë. Trojka kërcënon Greqinë se duhet të shkurtojë nga puna 200 mijë punonjës të administratës, ku më parë duhet të marrë masa për heqjen nga puna të 55 mijë punonjësve që u morën gjatë dy viteve të fundit.
Trojka: Brenda 2011, shkurtoni 60 mijë punonjës administrate
Trojka kërcënon Greqinë se duhet të shkurtojë për 2011 rreth 60 mijë punonjës administrate me qëllim ulje të buxhetit, duke i kërkuar gjithashtu që deri në fund të 2015 të shkurtojë edhe 100 mijë të tjerë. Faktikisht nga viti 2009 deri më sot janë shkurtuar ose larguar nga puna rreth 200 mijë punonjës të shërbimit publik, ku vetëm për vitin 2011 u shkurtuan nga puna 90 mijë punonjës të shërbimeve publike. Lidhur me shkurtimet nga puna, kryetari i opozitës së partisë Demokracia e Re (ND) z. Antonis Samaras ka theksuar se qeveria në asnjë mënyrë nuk duhet të bëjë shkurtime në bazë të bindjeve politike.
Kriza, 500 grekë i dhanë fund jetës së tyre
Të prekur nga kriza 500 vendas me mënyrat nga më të ndryshme i kanë dhënë fund jetës së tyre, kjo sipas publikimit të medias greke. Çdo ditë me dhjetra biznese greke dhe të huaja mbyllen, duke shtuar radhët e gjata të papunësisë, duke e çuar atë në 16.4%. Borxhet dhe kreditë janë arsyet që vendasit u japin fund jetës në mënyrat nga më tragjike në mënyrë publike. Dy ditë më parë i dhanë fund jetës dy njerëz, ku njeri u vetëvar dhe tjetri dogji veten.
Kriza në Greqi hap polemika në vendet e tjera
Kriza në Greqi ka hapur polemika të mëdha ndërmjet vendeve anëtare së eurozonës. Sipas medias greke, Ministri i Financave të Gjermanisë z. Vólfnkan'nk Sóimple ka deklaruar se: “Pjesëmarrja në Unionin Monetar është një mundësi, por edhe një përgjegjësi e rëndë. Masat për t’iu përshtatur është shumë e vështirë. Grekët duhet të vendosin nëse ata duhet të marrin këtë peshë”, duke hapur polemika të mëdha në politikën gjermane. Ministri gjerman ka kërkuar që Greqia duhet që të zbatojë premtimet e dhëna Trojkës për masat antikrizë, ndërsa homologu belg z. Didier Raiders deklaroi se Greqia ka nevojë "për tu vënë nën mbikqyrje" Kritika ka pasur edhe nga veterani dhe themeluesi i euros, nga ish presidenti francez Jacques Delors, në drejtim të BE për mënyrën se si trajtohet Greqia.
Papandreu anullon vizitën për në SHBA
Kryeministri grek, George Papandreu, ka anuluar një udhëtim të planifikuar për në Shtetet e Bashkuara për shkak të thellimit të krizës financiare në Greqi. Por kthimi i tij për në Athinë është kritikuar nga të gjitha partitë politike greke si një shantazh që i bëhet popullit të tij. Papandreu pritej të merrte pjesë në punimet e Asamblesë së Përgjithshme të Kombeve të Bashkuara dhe në takimin e Fondit Monetar Ndërkombëtar në Nju Jork, por ai është kthyer nga Anglia për në Greqi për t’u marrë me çështjet lidhur me krizën e borxheve të shtetit. Një telofonat e bërë nga ministri i tij i Financave Venizelos pas kthimit nga Polonia, kryeministri Papandreu ka mbledhur ditën e diel Këshillin e Ministrave për të diskutuar rezultatin e përmbushjeve te kërkesave të Trojkës, për marrjen e këstit të 6-të të kredisë, prej një shumë 8 miliardë eurosh nga BE dhe FMN-ja. Por për ti marrë këto qeveria greke duhet të përmbushë premtimet ndaj Trojkës.
Ministri i Mbrojtjes Kombëtare: Do jetojmë të varfër
Ministri i Mbrojtjes Kombëtare z. Panos Beglitis ka deklaruar në mediat vendase se do jetojmë të varfër, për këtë duhet të bëjmë sakrifica në mënyrë të organizuar dhe të ndershëm, pasi vendi ka nevojë për një “kontratë sociale”. Realiteti është se sakrificën e bën vetëm populli si një taksë pagues i rregullt përballë 72 taksave të vendosur në dy vitet të fundit, që ende nuk po japin rezultat në frenimin e shfrenuar të qeverisë që ende shpartallon pa masë shuma të mëdha. Borxhi jo vetëm që nuk është ulur po përkundrazi është rritur, duke venë pikëpyetjen se ku shkuan këto para të paguara nga taksapaguesit vendas dhe të huaj.
Ministri i Financave: Greqia po poshtërohet
Ministri i Financave i Greqisë, Evangelos Venizelos, pas kthimit të tij nga Polonia ka deklaruar se vendi i tij nuk duhet të përdoret si kokë turku për krizën e borxheve. Institucionet evropiane dhe ato ndërkombëtare po e përdorin Greqinë si një ‘falje të lehtë’ për të fshehur paaftësinë e tyre për të menaxhuar krizën. Greqia po shantazhohet dhe po poshtërohet. Reagimi i ministrit grek të Financave Vangjelis Venizelos, ndodh një kohë kur disa vende skandinave janë kundra ndihmës që duhet t’i jepet Greqisë. Nga testet e bëra shumë vende të tjera të BE janë kundra ndihmës që duhet t’i jepet këtij vendi, që sot po rrezikon mbarë eurozonën. Futja e Greqisë në eurozonë nga ana e Simitit ishte një veprim i nxituar pasi ekonomia e këtij vendi nuk ishte në atë shkallë njëlloj me vendet e tjera.
“Financial Times”: Greqia duhet të dalë nga eurozona, të kthehet tek dhrahmia
Në gazetën “Financial Times” ekonomisti i njohur Nouriel Roubini në një artikull të tij thekson se Greqia duhet të shpallë falimentimin dhe të dalë jashtë eurozonës. Për të shpëtuar Greqinë duhet që tani të fillojë një ristrukturim i rregullt i borxhit dhe të dalë nga eurozona për t’u kthyer tek dhrahmia, kjo pasi borxhi është përkeqësuar. Në çdo rast Greqia nuk mund të kthehet në rritjen e zhvillimit, pa rivendosur konkurrencën e saj dhe që kërkon "zhvlerësim real të monedhës së saj" kthimi në dhrahmi. Ai e pranon se ky proces do të jetë traumatike. Sa për bankat greke, duhen marrë masa të ngjashme me ato në Argjentinë, si kontrolli i kapitalit etj
Revista gjermane “Focus”: Humbën paratë tona, zhytet Akropoli
Edhe këtë radhë revista prestigjioze “Focus” në faqen e saj të parë tregon Akropolin të zhytur në ujë, ndërsa në det spikat një statujë koke me një shënim të euros me titull: “humbën paratë tona”, ndërsa më sipër faqes kryesore shkruhet “Miliarda euro për asgjë, Merkel në nevojë, çfarë duhet të dijë depozituesi për Euro-krizë”. Simbas medias greke, revista shoqërohet me një video ku thekson se falimentimi i Greqisë sa vjen dhe po afrohet më afër. Miliarda euro të gjermanëve fundosen pa asnjë rezultat. Do marrim përsëri paratë tona? Kredidhënësit janë të shqetësuar, a ka shpëtim? Pyet një nga redaktorët e kësaj reviste. Theksohet se nuk është hera e parë që kjo revistë trajton tema të kësaj natyre, por edhe ofenduese.Samaras,
Ende duhet të kemi Ministri Integrimi!?
Gazeta “SOT” 27 Shtator 2011
Integrimi i Shqipërisë nuk i përket vetëm Ministrisë së Integrimit, por gjithë politikës dhe shoqërisë shqiptare. Edhe pse rezultatet e kësaj ministrie janë tepër negative, shteti akoma vazhdon të paguajë nga xhepat e taksapaguesit shqiptar, punonjësit e këtij dikasteri “fantazmë”, të cilët nuk kanë asgjë të përbashkët me integrimin e vendit.
Skandali i fundit, fshehja e raportit të konkluzioneve të ekspertëve të komisionit të BE nga vetë ministrja e Integrimit znj. Bregu, vulos përfundimisht se ky institucion jo vetëm që nuk punon, por mbulon dhe mashtron konkluzionet e partnereve tanë të BE. Por që ky dikaster të qëndrojë ende në këmbë me paratë e popullit të varfër duhet ta justifikojë punën e deritanishme me vepra dhe jo me premtime dhe mashtrime. Suprimimi i tij sa më parë do të ishte gjëja më e mirë që mund të bënte shteti shqiptar.Integrimi i Shqipërisë në Bashkimin Evropian përbën misionin dhe objektivin shumë vjeçar të shtetit shqiptar, që njëkohësisht kishte gjetur edhe mbështetjen e partnerit më kryesor të BE.
Nënshkrimi me MSA në 2006 padyshim do të hapte një kapitull të ri perspektiv për popullin shqiptar, ndërsa shtetit i mbetej si gjithnjë një luftë e gjithanshme kundër korrupsionit dhe krimit të organizuar, reforma për krijimin e një ekonomie funksionale, të respektimit të të drejtave të njeriut, lirisë së medias etj.Për të arritur këtë objektiv historik, shteti shqiptar brenda kompetencave ngriti edhe një “dikaster të ri” të ashtuquajtur Ministria e Integrimit, që deri më sot ka dhënë vetëm rezultate negative, por që ende funksion si ministri.
Nga qeveria shqiptare u mendua se ngritja e këtij institucioni fantazmë do “vuloste” përfundimisht marrjen e statusit si kandidat, duke mos bërë më asnjë përpjekje më të vogël serioze. Një fjalë e urtë ruse thotë: “Në qoftë se nuk ke bërë atë që duhej bërë, atëherë ke bërë një krim”. Në vendin tonë ndodh e kundërta. Dy vite më pas, më 28 prill të 2009, Shqipëria paraqiti kërkesën për statusin kandidat për anëtarësimin në BE, duke qenë e ndërgjegjshme se ende nuk plotësonte kushtet më elementare, por ja që ndodh...Politika shqiptare, mbas rënies së komunizmit ka vuajtur dhe po vuan nga egoja dhe megalomania e ish komunizmit, që edhe pas njëzet vjetësh Shqipëria të mbetet e izoluar, jo vetëm nga vendet e Evropës, por edhe nga fqinjët e Ballkanit. Shqipëria si një vend demokratik ndërtuar mbi themelet e ish sistemit komunist nuk është më vendi i fundit në Evropë, por e fundit në Ballkanin Perëndimor. Kryeministri Sali Berisha nuk ka më kurajo t’i premtojë më popullit të tij për integrimin e vendit, pasi misioni i tij tashmë ka dështuar, bashkë me të edhe dikasteri përkatës, Ministria e Integrimit.
Kriza ekonomike po i detyron të gjitha vendet që të bëjnë reforma antikrizë në të gjitha fushat, duke mos përjashtuar edhe shtetin shqiptar. Si alogjikë, ngritja e ministrive bazohet në bazë të nevojave që ka vendi, por kur një ministri nuk i përgjigjet kërkesave të kohës, nuk ka rezultate në punën e saj, është e kotë të shpenzosh më për të. Integrimi i Shqipërisë nuk varet në vartësi të një ministrie se sa nga vullneti i mirëfilltë dhe angazhimi i gjithë politikës shqiptare.Skandalet dhe abuzimet me fondet e projekteve dhe të donatorëve të huaj, publikuar dhe trajtuar në median shqiptare, nga ish Drejtor pranë kësaj ministrie, Pal Gjoni, me profesion financier, Jurist (Avokat, Master), dërguar letër edhe kryeministrit shqiptar z. Sali Berisha, ambasadorit të Shteteve të Bashkuara të Amerikës, z. John Ëithers, si dhe Avokatit të Popullit z. Ermir Dobjani, ka prekur vetëm majën e ajsbergut të korrupsionit të kësaj ministrie “fantazmë”, përballë një shteti që kërkon portën e integrimit. A e meritojnë shqiptarët të trajtohen dhe njëkohësisht të dënohen moralisht nga ndërkombëtarët si një komb i fundit i Ballkanit për korrupsionet dhe paaftësisë politike të pushtetit të sotëm Berisha? A ka moral të dytë që shqiptarëve t’u premtohet akoma edhe njëherë nga qeveria Berisha për integrimin e vendit në BE? A duhet të kemi në këmbë ende një Ministri Integrimi? Përgjigjen më të mirë do ta jepte vetë qeveria e sotme Berisha, që në vend të bënte autokritikë, premton akoma ende pa mbushur standardet më elementare të një shteti.
Duhet të dimë që Komisioni Evropian po përpiqet konkretisht edhe njëherë për të mbështetur plotësimin e 12 kushteve apo të 21 kritereve, luftën kundër korrupsionit. Për këtë duhet një unitet i të gjithave partive politike, si dhe një opozitë në shkallën e duhur të një politike të kulturuar, duke mos lënë për në fund kritikat dhe vërejtjet.Shqipëria i tha “lamtumirë integrimit” për këtë vit, pasi edhe pse kishte në dispozicion një Ministri Integrimi, tregoi se nuk ishte akoma gati. Kjo nuk mund të fajësojë më asnjë më shumë sesa vetë qeverinë dhe ministrinë përkatëse që i kishin të gjitha mundësitë dhe shanset, por udhëheqësit shqiptarë nuk patën vullnet të mirëfilltë. Dimë që në komunitetin e BE sundon një shoqëri demokratike mbështetur nga ligji demokratik, në një shtet të drejtë e ligjor për të gjithë, dhe jo ashtu siç ndodh në Shqipëri, ku një grusht njerëzish kanë uzurpuar institucionet demokratike, dikasteret dhe mbarë shtetin. Këtë e di jo vetëm shoqëria shqiptare por edhe BE, ku Shqipëria pa bërë reforma të thella nuk mund të shpresojë më për integrim. Nga ana tjetër, BE i ka treguar Shqipërisë se ka një rrugë të gjatë për të mbërritur tek stacioni i integrimit për në BE, pasi nuk përmbush 12 kushtet më elementare, duke filluar nga e drejta e njeriut e deri tek reformat lidhur me pronat, duke e detyruar atë të futet me zor në rrugën e reformave, një rrugë që nuk i pëlqen sistemit të sotëm politik.
Skandali i fundit, fshehja e të dhënave të konkluzioneve të eksperteve të komisionit të BE nga ministrja e Integrimit zj. Bregu, vulos përfundimisht se ky institucion jo vetëm që nuk ka punuar, por me qëllim të caktuar mbulon dhe mashtron konkluzionet e BE. Suprimimi i kësaj ministrie duke u zëvendësuar me Drejtorinë e Integrimit do të ishte një veprim më i saktë nga ana e qeverisë, në përgjigje të kohës. Integrimi i vendit tonë nuk varet dhe nuk është peng në duart e kësaj ministrie sesa nga mungesa e vullneti të mirëfilltë dhe angazhim i gjithë politikës shqiptare, në mbështetje të gjithë shtetasve të saj.Shteti shqiptar me mentalitetin e tij primitiv kishte menduar se nëpërmjet Ministrisë së Integrimit do të përshpejtojë rrugën e integrimit të Shqipërisë me BE-në, në një kohë kur në Parlamentin shqiptar ekziston sot edhe një komision i tillë që luan një rol ndihmës në procesin për integrimin e vendit. Ngritja e Ministrisë së Integrimit gjatë 5-6 viteve nuk solli rezultate pozitive, por nga ana ekonomike ka rënduar edhe buxhetin e shtetit. Nga njëra anë shikojmë se vendet e tjera u futën në familjen europiane pa e pasur të nevojshme këtë ministri, ndërsa nga tjetër disa vende që nuk e këtë lloj ministrie janë më para nesh për t’u futur në familjen europiane.
Greqia në kaos të plotë, drejt falimentimit
Gazeta “ SOT” 6 Tetor 2011
Varfëria e madhe për Greqinë me një histori 3 mijë vjeçare, përbën një shembull tipik në BE, të cilët synojnë që ta kthejnë në një vend eksperimental për vendet e tjera të Bashkimit Evropian. Greqia bënte një jetë që nuk i takonte, një jetë të shfrenuar dhe luksoze me paratë e tjetërkujt, duke mos menduar se borxhi një ditë do të kthehej. Papritur dhe pa kujtuar për 20 vjet vendasit nga punëtorë u kthyen në agallarë duke shfrytëzuar krahët e të huajve, kundrejt një page qesharake. Rreth 600 mijë emigrantë punuan gjatë këtyre viteve në “punëra të zeza” pasi kështu e kërkonin interesat e sistemit politik të vendit.
Sot Trojka nën ombrellën e BE, kërkon ti gllabërojë këtij vendi atë që nuk i takon, duke i kërkuar që të shesë pasuritë e patundshme shtetërore.Kriza padyshim po rrit kriminalitetin dhe dyfishon numrin e vetëvrasjeve për 2011. Për vitin 2010 u regjistruan 500 vetëvrasje, ndërsa vrasjet me armë për 50-100 euro, çdo muaj u merr jetën 10 vendasve. Askush nuk fantazonte, askujt nuk i shkonte ndërmend se një ditë ky vend do të përfundonte në një kaos të vërtetë. Populli grek po jeton ditët më dramatike të pas luftës. Vendi është mbërthyer nga një krizë ekonomike dhe politike të vërtetë. Masat antikrizë, shkurtimi nga dita në ditë i vendeve të punës, varfëria dhe papunësia kanë gjunjëzuar përfundimisht shoqërinë vendase, që të ardhmen e shohin të pashpresë. Papritur populli grek papritur dhe kujtuar u gjend nga jetë “parajsë” në skëterrë. Nga një vend që dallohej për një jetë lluksoze dhe argëtimi, një vend kampion i vetëvrasjeve të Evropës.
Papandreu erdhi në qeveri me premtimin se vendi ka “para” dhe se i di ku janë, por gjatë 700 ditëve të qeverisjes së tij, paratë jo vetëm që nuk u gjetën, por vendi u fundos atje ku nuk e meritonte, duke ja dorëzuar më në fund Trojkës. Analistët e vendit i shikojnë me skepticizëm masat antikrizë të marra nga qeveria Papandreu, që borxhet jo vetëm nuk po ulen, por rriten edhe më tej. Kreditë e marra deri më sot nuk kanë bërë të mundur normalizimin e gjendjes, pasi pjesa më e madhe shkon për të larë interesat kreditore, si dhe për pagesat e punonjësve të shërbimit publik. Shumë qytetarë të Athinës janë kthyer dhe po kthehen në fshatrat nga erdhën, ndërsa emigrantët në vendlindjet e tyre.
Greqia ndodhet në një kaos të vërtetë, duket sikur vendi është kthyer peng i Trojkës, që nga ana e saj kërkon çdo ditë masa të reja në kurriz të popullit. Papandreu po e udhëheq vendin i vetëm pa asnjë aleatë, dhe përball kritikave të shumta të partive të tjera politike të vendit, që kërkojnë zgjedhje të parakohshme. Sikur të mos mjaftojnë këto, Papandreu ndodhet sot përballë edhe Kishës Ortodokse që i është bashkuar popullit. Marrja e masave antikrizë nga ana e qeverisë, shkurtimi i vendeve të punës i ka lëshuar terren edhe rritjes së kriminaliteti që nga dita në ditë po merr jetë njerëzish. Greqia, dikur një nga vendet më të sigurta në Evropë është kthyer sot në një nga më të pasigurta. Në ambientet e brendshme të metros apo trenit elektrik nga artopalanti dëgjon se udhëtari duhet të tregohet i kujdesshëm për të mos rënë viktimë e hajdutëve të xhepave dhe çantave.
Sot Varfëria ka prekur rreth 833.000 familje që jetojnë me të ardhura vjetore, më pak se 13.600 euro, këto të regjistruara para krizës ekonomike. Po sipas statistikave të Shërbimit Kombëtar të Greqisë (NSG) të vitit 2008, më shumë se 832.975 familje greke, ose 2.186.869 njerëz, janë të regjistruar në listën e varfërisë, baras kjo me 21 për qind të popullsisë të kërcënuar nga varfëria. Sipas studimit të kushteve të jetesës së familjes, të ardhurat në vitin 2008 ishin në pragun e rrezikut të varfërisë për person, me të ardhura vjetore prej 6.480 euro. Këtu nuk janë marrë në konsiderate emigrantët, shtresa e të pastrehëve apo të romeve (ciganëve).
Papunësia ka prekur rreth 850 mijë vendas, duke rritur shkallën e papunësisë në 16.5%. Ndërsa në 1 milion pritet të rritet vitin e ardhshëm, ku një në katër do të humbasë vendin e punës. Nëpër rrugë është rritur numri i lypsave, ndërsa në bashki dhe kisha numri i radhëve të gjata për një pjatë gjellë dhe një copë bukë. Kriza i ka dhënë teren krimit, ku për gjashtëmujorin e parë të këtij sipas medias vendase janë kryer 48.266 vjedhje, si dhe janë vjedhur 541 kisha. Çdo ditë regjistrohen mbi 290 vjedhje, dhe vritet një në çdo dy ditë. Sipas Organizatës të Punësimit të Fuqisë Punëtore (OAED) për muajin janar të 2011, numri i të papunëve të regjistruar u rrit nga 36.000 njerëz krahasuar me dhjetor (5,5% rritje) dhe mbi 74.272 në janar të vitit 2010 (12% rritje), duke arritur në 689.558 të papunëve të regjistruar. Përveç 689.600 të papunëve të regjistruar, ka edhe 144.700 të cilët nuk janë në kërkim për punë. Pra në përgjithësi papunësia arrin në 834.300 persona, në bazë të Statistikave të Shërbimit të Punësimit. 50 mijë grekë emigruan vjet në vendet e tjera të Evropës dhe në kontinentet më të largëta të botës, ndërsa sot Australia po bëhet shpëtimtari i këtij vendi, duke thithur emigrantë nga Greqia të çdo lloj profili.
Studimi i fundit i Eurobarometrit publikuar më 13 /07/ 2010 ka nxjerrë se 38 për qind e grekëve kanë deklaruar se janë gati për të emigruar në një vend tjetër për të gjetur punë. Emigrimi për të gjetur punë në një vend tjetër është kthyer në një fenomen si një nga çështjet më kryesore të vendasve, duke u kthyer mbrapa në vitet ‘60.Populli, i indinjuar dhe i prekur psikologjikisht është ngritur në këmbë si një kundërpërgjigje me protestat e shumta, mbështetur edhe nga rinia studentore dhe nga sindikatat. Sipas ministrit të Rendit Kristo Paputci, vitin e kaluar u bënë mbi 1.000 protesta dhe greva, ose 80 të tilla brenda një muaji.
Greqia, me një borxh tronditës prej 165 përqindësh të GDP-së, mundohet të zvogëlojë kësaj radhe numrin e punëtorëve në sektorin publik, si dhe do të mbledhë taksat pavarësisht kundërshtimeve dhe pamundësisë së njerëzve për t’i paguar ato. Deri në fund të vitit qeveria greke duhet të shkurtojë 30 mijë vende pune në administratën shtetërore, po kundra këtij vendimi janë partitë opozitare si dhe sindikatat e përgjithshme.700 shkolla dhe universitete janë mbyllur nga vetë studentët dhe nxënësit si një kundërpërgjigje qeverisë për mungesë mjetesh mësimore dhe për një arsim publik dhe jo privat. 7 ministri janë pushtuar dhe janë në duart e punonjësve të administratës, si kundërshtim të uljes së pagës.
Askush nuk mendon më për një rritje të zhvillimit ekonomik të vendit, aq sa që buka ardhur nga Bullgaria u shpërndahet familjeve me një të tretën në Greqinë e Veriut. Krizës ekonomike nuk i kanë shpëtuar as edhe emigrantët të cilët janë të parët që u prekën, kthimi i tyre në atdhe përbën një sfidë për qeverinë shqiptare.
